വേട്ടയാടി ഭക്ഷണം കണ്ടെത്തുന്ന വന്യമൃഗങ്ങൾ തലയിട്ട വെള്ളം ശുദ്ധിയുള്ളതാണോ?

വേട്ട തേടുന്ന മൃഗങ്ങളായ ചെന്നായ, പുലി, സിംഹം പോലുള്ള മൃഗങ്ങളും, പരുന്തിനെ പോലുള്ള പക്ഷികളും വന്യമൃഗങ്ങളിലാണ് ഉൾപ്പെടുക. ഇവയുടെ ഉമിനീരും, ഇവ കഴിച്ച ഭക്ഷണത്തിന്റെയും പാനീയത്തിന്റെയും ബാക്കിയും ശുദ്ധിയുള്ളതാണ്. മാലികീ, ശാഫിഈ, മദ്‌ഹബുകളുടെ അഭിപ്രായം ഇപ്രകാരമാണ്. [1] ഇമാം അഹ്മദിൽ നിന്ന് ഈ അഭിപ്രായം ചില നിവേദനങ്ങളിൽ സ്ഥിരപ്പെട്ടിട്ടുണ്ട്. [2] ശൈഖ് ഇബ്‌നു ഉഥൈമീൻ -رَحِمَهُ اللَّهُ- യുടെ അഭിപ്രായവും [3], ലജ്‌നതുദ്ദാഇമയുടെ ഫത്‌വയും ഇപ്രകാരം തന്നെ [4].

ശൈഖ് ഇബ്‌നു ഉസൈമീൻ -رَحِمَهُ اللَّهُ- ഈ വിധി ചില നിബന്ധനകളോടെയാണെന്ന് വിവരിച്ചിട്ടുണ്ട്. അദ്ദേഹം പറഞ്ഞു: “വേട്ടയാടുന്ന മൃഗങ്ങൾ തലയിട്ട വെള്ളം ധാരാളമുണ്ടെങ്കിൽ -അവ തലയിട്ടതിനാൽ അതിന്റെ നിറത്തിനോ മണത്തിനോ രുചിക്കോ മാറ്റമുണ്ടായിട്ടില്ലെങ്കിൽ- പ്രസ്തുത വെള്ളം ശുദ്ധീകരിക്കാൻ ഉപയോഗിക്കാം. എന്നാൽ വെള്ളം കുറച്ചു മാത്രമേ ഉള്ളൂ എന്നതിനൊപ്പം, മേൽ പറയപ്പെട്ട മൃഗങ്ങൾ തലയിട്ടതിനാൽ വെള്ളത്തിന്റെ ഗുണങ്ങൾക്ക് മാറ്റം സംഭവിച്ചുവെങ്കിൽ അത് നജിസാണ്. ഉപയോഗിക്കാവുന്നതല്ല.” (ശർഹുൽ മുംതിഅ്: 1/461-463)

ഇത്തരം മൃഗങ്ങളുടെ ഭക്ഷണപാനീയങ്ങളുടെ ബാക്കി ശുദ്ധിയാണെന്ന അഭിപ്രായം സ്വീകരിക്കാനുള്ള കാരണങ്ങൾ ഇവയാണ്:

1- ഇവയുടെ ഭക്ഷണപാനീയങ്ങളുടെ ബാക്കി അശുദ്ധമാണെന്ന് നിശ്ചയിക്കുന്നത് ജനങ്ങൾക്ക് പൊതുവെ പ്രയാസം സൃഷ്ടിക്കുന്നതാണ്. പ്രത്യേകിച്ച് വനപ്രദേശങ്ങളിലും മറ്റും താമസിക്കുന്നവർക്ക്. ജനങ്ങൾക്ക് പൊതുവെ പ്രയാസകരമായി തീരുന്ന കാര്യങ്ങളിൽ ഇസ്‌ലാം ഇളവ് നിശ്ചയിക്കാറുണ്ട്.

2- പൂച്ചയുടെ ഭക്ഷണപാനീയങ്ങളുടെ ബാക്കി ശുദ്ധിയുള്ളതാണ് എന്ന് സ്ഥിരപ്പെട്ടിരിക്കുന്നു. മേൽ പറയപ്പെട്ട മൃഗങ്ങളും പൂച്ചയും ഒരേ ഇനത്തിൽ ഉൾപ്പെടുത്തപ്പെടാവുന്നവയാണ്. കാരണം -അവയെ പോലെ- പൂച്ചയും വേട്ടയാടുകയും, നജിസ് ഭക്ഷിക്കുകയും ചെയ്യുന്ന ജീവികളിൽ പെട്ടതാണ്. [5]

[1]  المالكية: الشرح الكبير للدردير: 1/34، 35، مواهب الجليل للحطاب: 1/107، وينظر: المدونة الكبرى لسحنون: 1/115.

الشافعية: المجموع للنووي: 1/171، وينظر: الأم للشافعي: 1/18.

[2]  الشرح الكبير لابن قدامة: 1/310.

[3]  الشرح الممتع لابن عثيمين: 1/461-463.

[4]  فتاوى اللجنة الدائمة (المجموعة الأولى) : 5/380، رقم: 8052.

[5]  الشرح الكبير لابن قدامة: 1/312.