തലപ്പാവിന്മേൽ തടവുന്നത് സാധുവാകാൻ അത് പൂർണ്ണ ശുദ്ധിയിലായിരിക്കുമ്പോൾ (ത്വഹാറത്തിൽ – വുദു ഉള്ളപ്പോള്‍) ധരിച്ചതായിരിക്കണം എന്ന് നിബന്ധനയില്ല. ഇമാം അഹ്മദ് -رَحِمَهُ اللَّهُ- വിൽ നിന്നുള്ള ഒരു നിവേദനം ഇപ്രകാരമാണ്. സലഫുകളില്‍ ചിലരുടെ അഭിപ്രായവും ശൈഖുൽ ഇസ്‌ലാം ഇബ്‌നു തൈമിയ്യ -رَحِمَهُ اللَّهُ-, ശൈഖ് ഇബ്‌നു ഉഥൈമീൻ -رَحِمَهُ اللَّهُ- എന്നിവരുടെ വീക്ഷണവും ഇപ്രകാരം തന്നെ.
കാരണങ്ങൾ:
- തലപ്പാവ് ധരിക്കുന്നതിലെ ഇളവുകൾ വ്യക്തമാക്കുന്ന പ്രമാണങ്ങളിൽ ശുദ്ധി ഉണ്ടായിരിക്കണം എന്നത് ഒരു നിബന്ധനയായി സ്ഥിരപ്പെട്ടിട്ടില്ല.
- ഖുഫ്ഫയിന്മേൽ തടവണമെങ്കില്‍ അത് ശുദ്ധിയോടെ ധരിച്ചതായിരിക്കണം എന്ന നിബന്ധന ചിലര്‍ തലപ്പാവിന്റെ വിഷയത്തിലും താരതമ്യം ചെയ്തു പറഞ്ഞിട്ടുണ്ട്. എന്നാല്‍ ഇതിന് വ്യക്തമായ തെളിവുകളില്ല. ഖുഫ്ഫ ധരിക്കുമ്പോൾ ത്വഹാറത് ഉണ്ടായിരിക്കണമെന്നതിന് പ്രത്യേകം തെളിവുണ്ട്; എന്നാൽ തലപ്പാവിന്റെ കാര്യത്തിൽ അങ്ങനെ ഒരു കൽപ്പന വന്നിട്ടില്ല.
ഇമാം നവവി -رَحِمَهُ اللَّهُ- പറയുന്നു: “ഇബ്‌നുൽ മുൻദിർ -رَحِمَهُ اللَّهُ- പറഞ്ഞു: അബൂബക്ർ അസ്സ്വദ്ദീഖ് -رَضِيَ اللَّهُ عَنْهُ- തലപ്പാവിന്മേൽ തടവിയിട്ടുണ്ട്. ഉമർ, അനസ്, അബൂ ഉമാമഃ -رَضِيَ اللَّهُ عَنْهُمْ- തുടങ്ങിയവരുടെയും അഭിപ്രായം ഇതാണ് … എന്നാൽ അവരാരും തന്നെ തലപ്പാവ് തടവണമെങ്കില്‍ അത് ശുദ്ധിയോടെ ധരിക്കണമെന്ന് നിബന്ധന വെച്ചിട്ടില്ല.” [1]
ശൈഖ് ഇബ്‌നു ഉഥൈമീൻ -رَحِمَهُ اللَّهُ- പറയുന്നു: “തലപ്പാവ് ധരിക്കുമ്പോൾ അത് ത്വഹാറത്തോടു കൂടിയായിരിക്കണമെന്നോ അതിന് നിർണിതമായ സമയപരിധിയുണ്ടെന്നോ നിബന്ധനയില്ല. സോക്സുകളോട് (ഖുഫ്ഫുകളോട്) ഇതിനെ തുലനം ചെയ്യുന്നത് ശരിയല്ല. കാരണം സോക്സ് ധരിക്കുന്നത് കഴുകേണ്ട അവയവത്തിന്മേലാണ് (കാലുകൾക്ക് മീതെ); എന്നാൽ തലപ്പാവ് ധരിക്കുന്നതാകട്ടെ, തടവേണ്ട അവയവമായ തലക്ക് മേലെയാണ്. തലയാകട്ടെ, അതിന്റെ ശുദ്ധീകരണം അടിസ്ഥാനപരമായിത്തന്നെ ലഘൂകരിക്കപ്പെട്ടതുമാണ്.” [2]
അതായത്; വുദുവിന്റെ മറ്റു അവയങ്ങളില്‍ നിന്ന് വ്യത്യസ്തമായി തല കഴുകണമെന്ന് അല്ലെങ്കില്‍ തന്നെ കല്‍പ്പനയില്ല; വുദുവിന്റെ കാര്യത്തില്‍ പൊതുവേ ലഘൂകരിക്കപ്പെട്ട നിയമമുണ്ടായിരിക്കെ, തലപ്പാവ് തടവുന്നതിന് വുദു ഉണ്ടായിരിക്കണം എന്ന് നിബന്ധന വെക്കുന്നത് ശരിയല്ല എന്നര്‍ത്ഥം.
കുറിപ്പുകൾ:
[1] അൽ-മജ്മൂഅ് ശർഹുൽ മുഹദ്ദബ് (1/407).
[2] ലിഖാഉൽ ബാബിൽ മഫ്തൂഹ് (ലക്കം: 8).
<
p style=”font-size: 12px; color: rgb(100, 116, 139); border-top: 1px solid rgb(226, 232, 240); padding-top: 8px;”>അവലംബം: https://dorar.net/feqhia/281