കട്ടിയില്ലാത്തതും നേർത്തതുമായ കാലുറകൾക്ക് (സോക്സുകൾക്ക്) മീതെ വുദൂവിൽ തടവാമോ എന്ന വിഷയത്തിൽ പണ്ഡിതന്മാർക്കിടയിൽ രണ്ട് പ്രധാന വീക്ഷണങ്ങളുണ്ട്:
ഒന്നാമത്തെ വീക്ഷണം: കട്ടിയുള്ളതാണെങ്കിലും നേർത്തതാണെങ്കിലും കാലുറകൾക്ക് മീതെ തടവൽ നിരുപാധികം അനുവദനീയമാണ്. ദ്വാഹിരീ മദ്ഹബിന്റെയും ചില മുൻഗാമികളുടെയും അഭിപ്രായമാണിത്. ശൈഖുൽ ഇസ്ലാം ഇബ്നു തൈമിയ്യഃ, ഇമാം ഇബ്നു ഹസം, ശൈഖ് ഇബ്നു ഉഥൈമീൻ, ശൈഖ് അൽബാനി തുടങ്ങിയ പ്രമുഖ പണ്ഡിതന്മാർ ഈ അഭിപ്രായമാണ് പ്രബലപ്പെടുത്തിയത്. കാരണം കാലുറകൾക്ക് കട്ടി വേണമെന്നോ അത് പ്രകാശവും വെള്ളവും തടയുന്നതായിരിക്കണമെന്നോ ഉള്ള നിബന്ധനകളൊന്നും നബി -ﷺ- യിൽ നിന്നോ സ്വഹാബികളിൽ നിന്നോ വന്നിട്ടില്ല.
ഇസ്ലാമിക വിധിവിലക്കുകളിൽ നൽകപ്പെടുന്ന ഇത്തരം ഇളവുകൾ ജനങ്ങൾക്ക് കാര്യങ്ങൾ എളുപ്പമാക്കുക എന്ന ലക്ഷ്യത്തോടെയാണ് നിശ്ചയിക്കപ്പെട്ടിട്ടുള്ളത്. കാലിൽ ഉറച്ചുനിൽക്കുന്ന ഏത് സോക്സും ഇത്തരമൊരു ഇളവ് വേണ്ട കാര്യം തന്നെയാണ്.
രണ്ടാമത്തെ വീക്ഷണം: സോക്സുകൾക്ക് മീതെ തടവണമെങ്കിൽ, അവ കട്ടിയുള്ളതും, ഉള്ളിലെ തൊലി കാണാത്ത വിധത്തിലുള്ളതുമായിരിക്കണം. ഹനഫീ, മാലികീ, ശാഫിഈ, ഹമ്പലീ മദ്ഹബുകളിലെ ഭൂരിപക്ഷം പണ്ഡിതന്മാരുടെയും വീക്ഷണമാണിത്. തോൽ ഖുഫ്ഫയോട് താരതമ്യപ്പെടുത്തുമ്പോൾ അതിന്റെ തുല്യമായ ഉറപ്പും കട്ടിയും സോക്സിനും ഉണ്ടായിരിക്കണമെന്നാണ് അവർ അതിനുള്ള ന്യായമായി പറഞ്ഞിട്ടുള്ളത്.
നേർത്തതാണെങ്കിലും കാലിൽ ഉറച്ചുനിൽക്കുന്നതാണെങ്കിൽ തടവൽ അനുവദനീയമാണെന്ന ഒന്നാമത്തെ അഭിപ്രായത്തിനാണ് പ്രമാണങ്ങളുടെ നേരിട്ടുള്ള പിന്തുണയുള്ളത്. എന്നാൽ, പണ്ഡിതന്മാർക്കിടയിൽ സംഭവിച്ചിട്ടുള്ള അഭിപ്രായവ്യത്യാസത്തിൽ നിന്ന് ഒഴിഞ്ഞു നിൽക്കാനും, വുദൂഅ് സംശയമുക്തമാക്കാനും ഉദ്ദേശിക്കുന്നവർ കട്ടിയുള്ള സോക്സുകൾക്ക് മേൽ മാത്രം തടവുക എന്നതാണ് നല്ലത്.
