വെള്ളം

ഏത് വെള്ളമാണ് നജസ് ഉള്ളത് എന്ന് സംശയമുണ്ടായാൽ..?

ഒരാളുടെ മുന്നില്‍ രണ്ട് ബക്കറ്റുകളിലായി വെള്ളം ഉണ്ട് എന്ന് വെക്കുക. അതിലൊന്ന് ശുദ്ധിയുള്ളതും, മറ്റൊന്ന് നജിസുമാണെന്ന് വിചാരിക്കുക. എന്നാല്‍, ഏതാണ് നജിസ്, ഏതാണ് ശുദ്ധിയുള്ളത് എന്ന് അയാള്‍ക്ക് അറിയുകയുമില്ല. എന്താണ് ഇയാള്‍ ചെയ്യേണ്ടത്?

ശൈഖ് ഇബ്നു ഉഥൈമീന്‍ (رَحِمَهُ اللَّهُ) യെ പോലുള്ള പണ്ഡിതന്മാര്‍ പറഞ്ഞു: ‘അയാള്‍ സാധ്യമാകും വിധം രണ്ട് വെള്ളവും പരിശോധിക്കട്ടെ. അയാളുടെ പരിശോധനയില്‍ ശുദ്ധിയുള്ളതാകാൻ കൂടുതല്‍ സാധ്യത ഏതിനാണോ അത് അയാള്‍ ശുദ്ധീകരണത്തിന് ഉപയോഗിക്കട്ടെ.” ഇതല്ലാത്ത അഭിപ്രായങ്ങളുമുണ്ട്. പക്ഷേ, കൂടുതല്‍ ശരിയായ അഭിപ്രായമായി മനസ്സിലാകുന്നത് മേലെ പറഞ്ഞ അഭിപ്രായമാണ്. വല്ലാഹു അഅ്ലം.

നബി -ﷺ- യുടെ ഹദീഥാണ് മേല്‍ പറഞ്ഞതിനുള്ള തെളിവ്. നിസ്കാരത്തില്‍ വുദു നഷ്ടപ്പെടുന്നുണ്ടെന്ന സംശയം അധികരിച്ച വ്യക്തിയോട് നബി -ﷺ- പറഞ്ഞു:

«لاَ يَنْصَرِفُ حَتىَّ يَسْمَعَ صَوْتًا أَوْ يَجِدَ رِيْحًا»

“(കീഴ്ശ്വാസം പോകുന്ന) ശബ്ദം കേള്‍ക്കുകയോ, മണം അനുഭവപ്പെടുകയോ ചെയ്യുന്നത് വരെ അയാള്‍ നിസ്കാരത്തില്‍ നിന്ന് പിന്തിരിയേണ്ടതില്ല.” (മുസ്ലിം: 571)

ഈ ഹദീഥില്‍, വുദു പോയിട്ടുണ്ടോ എന്ന സംശയം ഉണ്ടായ വ്യക്തിയോട് ഉറപ്പ് ലഭിക്കുന്നത് വരെ നിസ്കാരത്തില്‍ നിന്ന് പിന്തിരിയരുതെന്നാണ് നബി -ﷺ- ഉപദേശിച്ചത്. കാരണം, തനിക്ക് വുദു ഉണ്ട് എന്ന ദൃഢവിശ്വാസം അയാള്‍ക്കുണ്ട്; അതിനെ ഇല്ലാതെയാക്കണമെങ്കില്‍ സമാനമായ ദൃഢവിശ്വാസം -വുദു പോയിട്ടുണ്ട് എന്ന ഉറപ്പ്- തന്നെ വേണം. അല്ലാതെ, കേവല സംശയം മാത്രം പോര.

ചുരുക്കത്തില്‍, വെള്ളത്തിന്‍റെ കാര്യത്തില്‍ സംശയമുണ്ടായാല്‍ അയാള്‍ക്ക് ഉറപ്പുള്ള കാര്യം സ്വീകരിക്കുക. ഉറപ്പ് ഉണ്ടാകുന്നില്ലെങ്കില്‍, സാഹചര്യത്തെളിവുകളുടെ അടിസ്ഥാനത്തില്‍ അയാള്‍ക്ക് കൂടുതല്‍ ശരിയാണെന്ന് മനസ്സിലാകുന്നത് അനുസരിച്ച് പ്രവര്‍ത്തിക്കുക.

വല്ലാഹു അഅ്ലം.

നന്മ അറിയിക്കുന്നവന് പിന്‍പറ്റിയവരുടെ പ്രതിഫലവുമുണ്ട് - ഷെയര്‍ ചെയ്യുക:

നിങ്ങളുടെ നിര്‍ദേശങ്ങള്‍ പങ്കുവെക്കൂ: