വുദൂവിൽ തല തടവിയ വെള്ളത്തിന്റെ നനവ് കൊണ്ട് തന്നെ ചെവികൾ തടവലാണ് സുന്നത്ത്; ചെവികൾക്കായി പുതിയ വെള്ളം പ്രത്യേകം എടുക്കേണ്ടതില്ല. ഹനഫീ മദ്‌ഹബിലെ അഭിപ്രായം ഇതാണ്. ഇമാം അഹ്മദിൽ നിന്നുള്ള ഒരു നിവേദനവും ഇപ്രകാരമാണ്. ഇബ്‌നു തൈമിയ്യ, ഇബ്‌നുൽ ഖയ്യിം, ശൈഖ് ഇബ്‌നു ബാസ്, ശൈഖ് ഇബ്‌നു ഉഥൈമീൻ തുടങ്ങിയ പ്രമുഖ പണ്ഡിതന്മാരും ഈ അഭിപ്രായമാണ് പ്രബലമായി തെരഞ്ഞെടുത്തിട്ടുള്ളത്.
എന്നാൽ ശാഫിഈ മദ്‌ഹബിലും ഇമാം അഹ്മദിന്റെ മറ്റൊരു നിവേദനത്തിലും ചെവി തടവുന്നതിനായി പ്രത്യേകമായി പുതിയ വെള്ളം എടുക്കൽ സുന്നത്താണെന്ന അഭിപ്രായമുണ്ട്. എങ്കിലും നബി -ﷺ- യിൽ നിന്ന് സ്ഥിരപ്പെട്ടു വന്നിട്ടുള്ള പ്രബലമായ ഹദീഥുകൾ വ്യക്തമാക്കുന്നത് തല തടവിയ വെള്ളത്തിന്റെ അവശേഷിക്കുന്ന നനവ് കൊണ്ട് തന്നെയാണ് ചെവികളും തടവിയിരുന്നത് എന്നാണ്.
ഇബ്‌നുൽ ഖയ്യിം -رَحِمَهُ اللَّهُ- പറയുന്നു: “നബി -ﷺ- തലയോടൊപ്പം തന്നെയായിരുന്നു തന്റെ രണ്ട് ചെവികളും തടവിയിരുന്നത്. അവിടുന്ന് ചെവിയുടെ പുറംഭാഗവും ഉൾഭാഗവും തടവിയിരുന്നു. ചെവികൾക്കായി അവിടുന്ന് പുതിയ വെള്ളം എടുത്തതായി സ്ഥിരപ്പെട്ടിട്ടില്ല; എന്നാൽ ഇബ്‌നു ഉമർ -رَضِيَ اللَّهُ عَنْهُمَا- അപ്രകാരം ചെയ്തതായി വന്നിട്ടുണ്ട്.” (സാദുൽ മആദ്: 1/194)
ശൈഖ് ഇബ്‌നു ഉഥൈമീൻ -رَحِمَهُ اللَّهُ- പറയുന്നു: “ചെവികൾ തടവാനായി വേറെത്തന്നെ വെള്ളം എടുക്കൽ നിർബന്ധമില്ല; ശരിയായ അഭിപ്രായപ്രകാരം അത് സുന്നത്തുപോലുമല്ല. കാരണം നബി -ﷺ- യുടെ വുദൂഅ് വിവരിച്ച സ്വഹാബികളിൽ ആരും തന്നെ അവിടുന്ന് ചെവികൾക്കായി വേറെത്തന്നെ വെള്ളം എടുത്തതായി പറഞ്ഞിട്ടില്ല. അതിനാൽ തല തടവിയ ശേഷം കയ്യിൽ അവശേഷിക്കുന്ന നനവ് കൊണ്ട് ചെവികളും തടവലാണ് ഏറ്റവും ഉത്തമം.” (മജ്‌മൂഉ ഫതാവാ: 11/141)
ഇബ്‌നു അബ്ബാസ് -رَضِيَ اللَّهُ عَنْهُمَا- നിവേദനം:
«رَأَيْتُ النَّبِيَّ صَلَّى اللهُ عَلَيْهِ وَسَلَّمَ تَوَضَّأَ، وفيه: وَغَرَفَ غَرْفَةً فَمَسَحَ رَأْسَهُ وَبَاطِنَ أُذُنَيْهِ وَظَاهِرَهُمَا، وَأَدْخَلَ أُصْبُعَيْهِ فِيهِمَا»
“നബി -ﷺ- വുദൂഅ് ചെയ്യുന്നത് ഞാൻ കണ്ടു: … അവിടുന്ന് ഒരു കൈക്കുമ്പിൾ വെള്ളമെടുത്ത് തന്റെ തലയും ചെവികളുടെ ഉൾഭാഗവും പുറംഭാഗവും തടവുകയും, തന്റെ വിരലുകൾ ചെവികളിൽ പ്രവേശിപ്പിക്കുകയും ചെയ്തു.” (തിർമിദി: 36, അൽബാനി സ്വഹീഹ് എന്ന് വിലയിരുത്തി)
നബി -ﷺ- യുടെ വുദൂഇന്റെ രൂപം വിശദീകരിച്ച സ്വഹാബികളിൽ ആരും തന്നെ അവിടുന്ന് ചെവികൾ തടവാനായി പ്രത്യേകമായി പുതിയ വെള്ളം എടുത്തതായി പ്രസ്താവിച്ചിട്ടില്ല. തല തടവിയ വെള്ളം കൊണ്ട് തന്നെയാണ് ചെവികളും തടവേണ്ടത് എന്ന് ഇതിൽ നിന്ന് വ്യക്തമാകുന്നു.
അബ്ദുല്ലാഹിബ്‌നു ഉമർ -رَضِيَ اللَّهُ عَنْهُمَا- പറയുന്നു:
«الأُذُنَانِ مِنَ الرَّأْسِ»
“ചെവികൾ തലയുടെ ഭാഗമാണ്.” (മുസ്വന്നഫ് / അബ്ദിറസാഖ്: 24, ദാറുഖുത്‌നി: 1/98)
ചെവികൾ തലയിൽ നിന്ന് വേറിട്ടുനിൽക്കുന്ന സ്വതന്ത്രമായ അവയവങ്ങളല്ല, മറിച്ച് തലയുടെ ഭാഗം തന്നെയാണ് എന്ന് ഇബ്‌നു ഉമറിന്റെ ഈ വാക്ക് അറിയിക്കുന്നുണ്ട്. അതിനാൽ തല തടവുന്ന വെള്ളം കൊണ്ട് തലയോടൊപ്പം തന്നെയാണ് ചെവികളും തടവേണ്ടത് എന്ന് ഈ പറഞ്ഞതിൽ നിന്ന് മനസ്സിലാക്കാം. (ശർഹുൽ മുംതിഅ് / ഉഥൈമീൻ: 1/179)