പ്രപഞ്ച സ്രഷ്ടാവായ അല്ലാഹുവിന്റെ അസ്തിത്വവും അവന്റെ പരമാധികാരത്തിലുള്ള ഏകത്വവും തെളിയിക്കുന്നതിന് വിശുദ്ധ ഖുർആൻ സ്വീകരിച്ചിട്ടുള്ള രീതിശാസ്ത്രം മനുഷ്യന്റെ പരിശുദ്ധമായ പ്രകൃതത്തോടും ശരിയായ ബുദ്ധിയോടും പൂർണ്ണമായും പൊരുത്തപ്പെടുന്നതാണ്. മൂന്ന് സുപ്രധാനമായ പ്രമാണങ്ങളാണ് ഖുർആൻ ഇതിനായി മുന്നോട്ടുവെക്കുന്നത്.
ഏതൊരു വസ്തുവും പുതുതായി ഉണ്ടായതാണെങ്കിൽ അതിനെ നിർമ്മിച്ച ഒരു കർത്താവ് അതിന് ഉണ്ടായിരിക്കണം എന്നത് കേവല ബുദ്ധിയാണ്. കൊച്ചുകുട്ടികളിൽ പോലും ഈ ബോധ്യം സ്വാഭാവികമായുണ്ട്; ഉദാഹരണത്തിന്, ഒരു കുട്ടിയെ അവൻ കാണാതെ പിറകിൽ നിന്ന് അടിച്ചാൽ ‘ആരാണ് എന്നെ അടിച്ചത്?’ എന്ന് അവൻ ചോദിച്ചിരിക്കും. ‘നിന്നെ ആരും അടിച്ചിട്ടില്ല; ഒരു അടി വെറുതെ ഉണ്ടായതാണ്’ എന്ന് പറഞ്ഞാൽ അവന്റെ ബുദ്ധി അതൊരിക്കലും സ്വീകരിക്കില്ല; കാരണമില്ലാതെ ഒരു കാര്യമുണ്ടാകില്ല എന്ന് അവനറിയാം. ഈ സ്വാഭാവിക യുക്തിയെ അഭിസംബോധന ചെയ്തുകൊണ്ട് അല്ലാഹു ചോദിക്കുന്നു:
“അതല്ല, യാതൊരു വസ്തുവിൽ നിന്നുമല്ലാതെ (സ്രഷ്ടാവില്ലാതെ) അവർ സൃഷ്ടിക്കപ്പെട്ടിരിക്കുകയാണോ? അതല്ല, അവരാണോ സ്രഷ്ടാക്കൾ?» (ത്വൂർ: 35).
ഈ ആയത്ത് ശ്രദ്ധിച്ചു നോക്കൂ; മനുഷ്യന് മുൻപിൽ തന്റെ ഉത്ഭവത്തിന്റെ കാരണമായി മൂന്ന് സാധ്യതകൾ മാത്രമേ മുന്നിലുള്ളൂ: ഒന്നല്ലെങ്കിൽ ഒരു സ്രഷ്ടാവില്ലാതെ അവൻ സ്വയംഭൂവായി തനിയെ ഉണ്ടാവുക എന്നതാണ്. അല്ലെങ്കിൽ, അവൻ തന്നെ അവനെ സൃഷ്ടിച്ചു എന്നു പറയലാണ്. അതുമല്ലെങ്കിൽ, അവരെ സൃഷ്ടിച്ച സർവ്വശക്തനായ ഒരു സ്രഷ്ടാവുണ്ടായിരിക്കുക എന്നതാണ്.
ആദ്യത്തെ രണ്ട് സാധ്യതകളും തികച്ചും അസംബന്ധവും അസാധ്യവുമാണ് എന്നതിൽ ബുദ്ധിയുള്ള ഒരാൾക്കും സംശയമുണ്ടാകില്ല. അതിനാൽ വഴി മാത്രമേ അവന് മുന്നിലുള്ളൂ; സർവ്വശക്തനായ ഒരു സ്രഷ്ടാവാണ് അവനെ സൃഷ്ടിച്ചത് എന്നതാണത്. അതാകട്ടെ, അനിഷേധ്യമായ ഒരു യാഥാർത്ഥ്യമാണ്.
അല്ലാഹു അല്ലാത്തവരെ ആരാധിക്കുന്നവരെ വെല്ലുവിളിച്ചുകൊണ്ട് അല്ലാഹു പറഞ്ഞ വചനത്തിലും ഇതേ കാര്യം മറ്റൊരു നിലക്ക് സ്ഥാപിക്കപ്പെടുന്നുണ്ട്:
“ഇതൊക്കെ അല്ലാഹുവിന്റെ സൃഷ്ടികളാണ്. എന്നാൽ അവനൊഴികെയുള്ളവർ സൃഷ്ടിച്ചതെന്തെന്ന് നിങ്ങൾ എനിക്ക് കാണിച്ചുതരൂ!” (ലുഖ്മാൻ: 11).
“തീർച്ചയായും അല്ലാഹുവിന് പുറമെ നിങ്ങൾ പ്രാർത്ഥിക്കുന്നവരാരും ഒരു ഈച്ചയെപ്പോലും സൃഷ്ടിക്കുകയില്ല; അതിനായി അവരെല്ലാവരും ഒത്തുചേർന്നാൽ പോലും.” (ഹജ്ജ്: 73).
ഈ ആയത്തുകളിൽ അല്ലാഹുവല്ലാത്ത മറ്റു വല്ലവരും വല്ലതും സൃഷ്ടിച്ചതായുണ്ടോ എന്ന് അല്ലാഹു വെല്ലുവിളിക്കുന്നു; ഇന്നു വരെ ഒരൊറ്റ വസ്തുവിനെയെങ്കിലും തങ്ങൾ സൃഷ്ടിച്ചുവെന്ന് അവകാശപ്പെടാൻ ആർക്കും സാധിച്ചിട്ടില്ല. യാതൊരു പങ്കുകാരനുമില്ലാത്ത ഏക സ്രഷ്ടാവ് അല്ലാഹു മാത്രമാണ് എന്നതിന് ഈ പറഞ്ഞതും മറ്റൊരു തെളിവാണ്.