നോമ്പ്

നോമ്പും ലൈംഗികതയും

നന്മ അറിയിക്കുന്നവന് പിന്‍പറ്റിയവരുടെ പ്രതിഫലവുമുണ്ട് - പ്രചരിപ്പിക്കുക:

റമദാനിന്റെ രാത്രികളില്‍ ഭാര്യയുമായി ലൈംഗികബന്ധത്തില്‍ ഏര്‍പ്പെടുന്നത് അല്ലാഹു -تَعَالَى- അനുവദിച്ചിട്ടുണ്ട്. അല്ലാഹു പറഞ്ഞു:

أُحِلَّ لَكُمْ لَيْلَةَ الصِّيَامِ الرَّفَثُ إِلَىٰ نِسَائِكُمْ ۚ هُنَّ لِبَاسٌ لَّكُمْ وَأَنتُمْ لِبَاسٌ لَّهُنَّ ۗ


“നോമ്പിന്റെ രാത്രിയില്‍ നിങ്ങളുടെ ഭാര്യമാരുമായുള്ള സംസര്‍ഗം നിങ്ങള്‍ക്ക് അനുവദിക്കപ്പെട്ടിരിക്കുന്നു. അവര്‍ നിങ്ങള്‍ക്കൊരു വസ്ത്രമാകുന്നു. നിങ്ങള്‍ അവര്‍ക്കും ഒരു വസ്ത്രമാകുന്നു.” (ബഖറ: 187)

റമദാനിന്റെ രാത്രിയില്‍ മാത്രമേ ലൈംഗികബന്ധം അനുവാദമുള്ളു എന്ന് പറഞ്ഞതില്‍ നിന്ന് റമദാനിലെ പകലുകളില്‍ അത് അനുവദനീയമല്ലെന്ന് മനസ്സിലാക്കാം. മേല്‍ പറഞ്ഞതല്ലാത്ത അനേകം തെളിവുകള്‍ ഈ വിഷയത്തില്‍ വേറെയും വന്നിട്ടുണ്ട്. പണ്ഡിതന്മാര്‍ക്ക് ഇക്കാര്യത്തില്‍ എകാഭിപ്രായവും ഉണ്ട്.

റമദാനിന്റെ പകലിലെ ലൈംഗികബന്ധം:

റമദാനിന്റെ പകലിലെ ലൈംഗികബന്ധം നോമ്പ് മുറിക്കും എന്നത് കൊണ്ട് ഉദ്ദേശിക്കുന്നത് പുരുഷന്‍ തന്റെ ലൈംഗികാവയവം സ്ത്രീയുടെ യോനിയില്‍ പ്രവേശിപ്പിക്കലാണ്. ഈ പ്രവൃത്തി കാരണത്താല്‍ മനിയ്യ്‌ (ഇന്ദ്രിയം) പുറത്തു വന്നാലും ഇല്ലെങ്കിലും അതോടെ നോമ്പ് മുറിയും. ഇക്കാര്യം ഖുര്‍ആന്‍ കൊണ്ടും, ഹദീസ് കൊണ്ടും, ഇജ്മാഅ കൊണ്ടും സ്ഥിരപ്പെട്ട കാര്യമാണ്.

പൂര്‍ണമായ ലൈംഗികബന്ധം എന്നു പ്രത്യേകം പറയാനുള്ള കാരണം കേവല ബാഹ്യകേളികള്‍ കൊണ്ടോ, പരസ്പരം ചുംബിക്കുന്നത് കൊണ്ടോ ഒന്നും നോമ്പ് മുറിയുകയില്ല. മറിച്ച്, മേലെ വിശദീകരിക്കപ്പെട്ട പോലെ ലൈംഗികാവയവങ്ങള്‍ പരസ്പരം സ്പര്‍ശിക്കുമ്പോള്‍ മാത്രമാണ് നോമ്പ് മുറിയുന്നത്.

നിര്‍ബന്ധമോ സുന്നതോ ആകട്ടെ; നോമ്പ് അനുഷ്ഠിക്കുന്ന പകലില്‍ ലൈംഗികബന്ധത്തില്‍ ഏര്‍പ്പെട്ടാല്‍ അതോടെ അവന്റെ നോമ്പ് മുറിയും. നോമ്പ് മുറിക്കുന്ന കാര്യങ്ങളില്‍ ഏറ്റവും ഗുരുതരമായത് നോമ്പിന്റെ പകലില്‍ ലൈംഗികബന്ധത്തില്‍ ഏര്‍പ്പെടലാണ്. റമദാന്‍ മാസത്തിലാണ് അത് അവന്‍ ചെയ്യുന്നതെങ്കില്‍ ആ മാസത്തിന്റെ പവിത്രതയും പരിശുദ്ധിയും അതിലൂടെ അവന്‍ കളഞ്ഞു കുളിക്കുന്നു. അല്ലാഹു ആദരിച്ചതിനെ അവന്‍ നിന്ദിച്ചിരിക്കുന്നു.

റമദാന്‍ മാസത്തിലെ പകലില്‍ നോമ്പുകാരനായിരിക്കെ ലൈംഗികബന്ധത്തില്‍ ഏര്‍പ്പെട്ടാല്‍ അവന്‍ ആ നോമ്പ് നോറ്റു വീട്ടുകയും, അല്ലാഹുവിനോട്‌ പശ്ചാത്താപം തേടുകയും, താന്‍ ചെയ്ത തെറ്റിന്റെ കഫാറത് നിര്‍വ്വഹിക്കുകയും ചെയ്യേണ്ടതുണ്ട്. റമദാനിന്റെ പകലില്‍ ലൈംഗികബന്ധത്തില്‍ ഏര്‍പ്പെട്ടാല്‍ അതിനുള്ള കഫാറത് താഴെ പറയുന്നത് പോലെയാണ്.

  • ഒരു മുഅ്മിനായ അടിമയെ മോചിപ്പിക്കുക.
  • അടിമയെ മോചിപ്പിക്കാന്‍ കഴിയില്ലെങ്കില്‍ രണ്ട് മാസം തുടര്‍ച്ചയായി നോമ്പ് അനുഷ്ഠിക്കുക. മതപരമായ ഒഴിവുകഴിവ് ഇല്ലാതെ ഈ രണ്ടു മാസങ്ങള്‍ക്കിടയില്‍ നോമ്പ് ഒഴിവാക്കാന്‍ പാടില്ല.
  • രണ്ട് മാസം തുടര്‍ച്ചയായി നോമ്പ് അനുഷ്ഠിക്കാന്‍ കഴിയില്ലെങ്കില്‍ അറുപത് ദരിദ്രര്‍ക്ക് ഭക്ഷണം നല്‍കുക. നാട്ടില്‍ പൊതുവേ ജനങ്ങള്‍ കഴിക്കുന്ന ഭക്ഷണമാണ് നല്‍കേണ്ടത്.
  • മേല്‍ പറഞ്ഞ ഒന്നും കഴിയില്ലെങ്കില്‍ അവന്റെ മേല്‍ കഫാറത് ബാധ്യതയില്ല. എന്നാല്‍ അവന്‍ അല്ലാഹുവിനോട് പശ്ചാത്താപം ചോദിക്കുകയും, തന്റെ തെറ്റില്‍ ഖേദിക്കുകയും ചെയ്യേണ്ടതുണ്ട്.

ഈ കഫാറത് റമദാനിന്റെ പകലില്‍ ലൈംഗികബന്ധത്തില്‍ ഏര്‍പ്പെട്ടാല്‍ മാത്രമാണ് ബാധകമാവുക. മറ്റു നിര്‍ബന്ധനോമ്പുകള്‍ നോല്‍ക്കുന്ന സന്ദര്‍ഭങ്ങളില്‍ -ഉദാഹരണത്തിന്; നേര്‍ച്ചയുടെ നോമ്പോ, റമദാനിലെ നഷ്ടപ്പെട്ട നോമ്പുകള്‍ കടം വീട്ടുമ്പോഴോ- ഒക്കെയാണ് പകലില്‍ ലൈംഗികബന്ധത്തില്‍ ഏര്‍പ്പെട്ടതെങ്കില്‍ മേല്‍ പറഞ്ഞ കഫാറത് നിര്‍ബന്ധമില്ല. അവന്‍ നഷ്ടപ്പെട്ട നോമ്പ് നോറ്റ് വീട്ടുകയും, സംഭവിച്ചു പോയ തെറ്റിന് അല്ലാഹുവിനോട് പശ്ചാത്തപിക്കുകയും ചെയ്‌താല്‍ മതി.

ബോധപൂര്‍വ്വം സ്ഖലനം സംഭവിപ്പിക്കല്‍:

സ്വന്തം ഇഛ്പ്രകാരം മനിയ്യ്‌ (ഇന്ദ്രിയം) പുറത്ത് കൊണ്ടു വരുക എന്നതില്‍ പല രൂപങ്ങള്‍ ഉള്‍പ്പെടും. സ്പര്‍ശനത്തിലൂടെയോ, ചുംബനത്തിലൂടെയോ മനിയ്യ്‌ പുറത്ത് പോകുന്നത് ഉദാഹരണം. സ്വയംഭോഗം ചെയ്യുന്നതിലൂടെയും, ആവര്‍ത്തിച്ചുള്ള നോട്ടത്തിലൂടെയും ഇത് സംഭവിക്കാം. ഈ പറഞ്ഞതിലൂടെയെല്ലാം മനിയ്യ്‌ പുറത്തു വരാനും, അതിലൂടെ നോമ്പ് മുറിയാനും സാധ്യതയുണ്ട്.

എന്നാല്‍ പ്രത്യേകം ശ്രദ്ധിക്കുക!

മേല്‍ പറഞ്ഞ കാര്യങ്ങളില്‍ ചിലത് നോമ്പുകാരന്‍ ചെയ്യുന്നതേ അനുവദനീയമല്ല. ഉദാഹരണത്തിന്; സ്വയംഭോഗം. നോമ്പുകാരനാകട്ടെ, അല്ലാത്തവരാകട്ടെ; സ്വയംഭോഗം ചെയ്യല്‍ നിഷിദ്ധമാണ്. അത് മനിയ്യ്‌ പുറത്തു വന്നാലും ഇല്ലെങ്കിലും പാടില്ല. -തന്റെ ദേഹേഛകളെ നിയന്ത്രിക്കേണ്ട- നോമ്പുകാരന്‍ എന്തു കൊണ്ടും അത് പ്രവര്‍ത്തിക്കരുത്.

എന്നാല്‍ സ്വയംഭോഗം ചെയ്യുകയും മനിയ്യ്‌ പുറത്ത് വരികയും ചെയ്തിട്ടില്ലെങ്കിലോ?

സ്വയംഭോഗം ആരംഭിക്കുകയും, മനിയ്യ്‌ പുറത്ത് വരുകയും ചെയ്തിട്ടില്ലെങ്കില്‍ അവന്റെ നോമ്പ് മുറിയില്ല. പക്ഷെ അവന്‍ ചെയ്തത് തിന്മയാണ്. അല്ലാഹുവിനോട് പൊറുക്കലിനെ തേടണം.

ചില കാര്യങ്ങള്‍ ചിലര്‍ക്ക് അനുവദനീയവും മറ്റു ചിലര്‍ക്ക് നിഷിദ്ധവുമായിരിക്കും. ഉദാഹരണത്തിന്; തന്റെ ഭാര്യയെ നോക്കുന്നത് ഭര്‍ത്താവിനും, ഭര്‍ത്താവിനെ നോക്കുന്നത് ഭാര്യക്കും അനുവദനീയമാണ്. എന്നാല്‍, അന്യസ്ത്രീകളെ നോക്കുക എന്നതും, അതില്‍ ആസ്വാദനം കണ്ടെത്തുക എന്നതും -നോമ്പുകാര്‍ക്കും അല്ലാത്തവര്‍ക്കും- നിഷിദ്ധമാണ്.

സ്പര്‍ശനവും ചുംബനവുമെല്ലാം മേല്‍ പറഞ്ഞതു പോലെ തന്നെ. ഭാര്യാ-ഭര്‍ത്താക്കന്മാര്‍ക്ക് പരസ്പരം അവ അനുവദനീയമാണ്. നോമ്പിന്റെ സന്ദര്‍ഭത്തിലും അല്ലാത്ത വേളകളിലും. അല്ലാത്തവര്‍ക്ക് പാടില്ല.

എന്നാല്‍ കേവല നോട്ടം കൊണ്ടോ, ചുംബനം കൊണ്ടോ നോമ്പ് മുറിയുമോ?!

ഇല്ല. നോമ്പ് മുറിയില്ല. ഭാര്യാഭര്‍ത്താക്കന്മാര്‍ക്ക് ചില സന്ദര്‍ഭങ്ങളില്‍ അപ്രകാരം ചെയ്യല്‍ അനുവദനീയവുമാണ്. നബി -ﷺ- നോമ്പുകാരനായിരിക്കെ തന്റെ ഭാര്യമാരെ ചുംബിക്കുകയും, അവരുമായി ബാഹ്യകേളികളില്‍ ഏര്‍പ്പെടുകയും ചെയ്യാറുണ്ടായിരുന്നു.

എന്നാല്‍ ചില സന്ദര്‍ഭങ്ങളില്‍ ഭാര്യാ-ഭര്‍ത്താക്കന്മാര്‍ പരസ്പരം ചുംബിക്കുന്നതും സ്പര്‍ഷിക്കുന്നതും -എന്തിന്?! ലൈംഗിക തൃഷ്ണയോടെ നോക്കുന്നതു പോലും- ചിലരെ സംബന്ധിച്ചിടത്തോളം നിഷിദ്ധമോ വെറുക്കപ്പെട്ടതോ ആയേക്കാം. എപ്പോഴാണത് അപ്രകാരമാവുക?!

ഇത്തരം നോട്ടങ്ങളും സ്പര്‍ശനങ്ങളും ചുംബനവും ശരിയായ ലൈംഗികബന്ധത്തിലേക്കും, അതിലൂടെ റമദാനിന്റെ പകലില്‍ ഗുരുതരമായ തെറ്റ് ചെയ്യുന്നതിലേക്കും നയിക്കും എന്ന് ഭയപ്പെടുകയുമാണെങ്കിലാണ് ഇവ നിഷിദ്ധമാവുക. കാരണം, ഹറാമിലേക്ക് നയിക്കുന്ന കാര്യങ്ങളും ഹറാം തന്നെ.

ചുരുക്കത്തില്‍, മനിയ്യ്‌ പുറത്തു വരുക എന്നത് സംഭവിക്കില്ലെന്ന ഉറപ്പുണ്ടെങ്കില്‍ ഭാര്യാഭര്‍ത്താക്കന്മാര്‍ പരസ്പരം സ്പര്‍ശിക്കുകയും ചുംബിക്കുകയും ചെയ്യുന്നതില്‍ തെറ്റില്ല. എന്നാല്‍, തെറ്റിലേക്ക് എത്തുമെന്ന ഭയമോ ഉറപ്പോ ഉണ്ടെങ്കില്‍ അത് ചെയ്യുക എന്നത് അനുവദനീയവുമല്ല.

നോമ്പുകാരനായിരിക്കെ ബാഹ്യകേളികളില്‍ ഏര്‍പ്പെടാമോ എന്ന് ഒരു യുവാവ് ചോദിച്ചപ്പോള്‍ നബി -ﷺ- തടയുകയും, മറ്റൊരു വൃദ്ധന്‍ ചോദിച്ചപ്പോള്‍ അനുവദിക്കുകയും ചെയ്തതായി ഹദീസില്‍ വന്നിട്ടുണ്ട്. നാം മേല്‍ പറഞ്ഞ കാര്യത്തിലേക്ക് ഇതും സൂചന നല്‍കുന്നുണ്ട്. (അബൂദാവൂദ്: 2387)

എന്നാല്‍ ഉറക്കത്തിലോ പാതിമയക്കത്തിലോ സ്വപ്നസ്ഖലനം സംഭവിച്ചാലോ, ലൈംഗികതയുമായി ബന്ധപ്പെട്ട കാര്യങ്ങള്‍ ചിന്തിച്ചതിനാല്‍ സ്ഖലനം സംഭവിച്ചാലോ നോമ്പ് മുറിയുകയില്ല. കാരണം അതെല്ലാം ബോധപൂര്‍വ്വമല്ലാതെ സംഭവിക്കുന്ന കാര്യങ്ങളാണ്. അവ അല്ലാഹു -تَعَالَى- ഈ ഉമ്മത്തിന് പൊറുത്തു കൊടുത്തിരിക്കുന്നു എന്ന് ഖുര്‍ആന്‍ കൊണ്ടും ഹദീസ് കൊണ്ടും സ്ഥിരപ്പെട്ട കാര്യമാണ്.

ഇത്രയും പറഞ്ഞതില്‍ നിന്ന് റമദാനിന്റെ പകലില്‍ ബോധപൂര്‍വ്വം സ്ഖലനം സംഭവിപ്പിച്ചാല്‍ നോമ്പ് മുറിയും എന്ന് മനസ്സിലായി കാണുമല്ലോ? എന്നാല്‍, എന്താണ് നഷ്ടപ്പെട്ട നോമ്പിന് പകരമായി അവന്‍ ചെയ്യേണ്ടത്?

പൂര്‍ണ്ണമായ ലൈംഗികബന്ധത്തില്‍ ഏര്‍പ്പെട്ടവന്‍ ചെയ്യേണ്ടത് പോലെ അവന്‍ കഫാറത് നല്‍കേണ്ടതില്ല. മറിച്ച്, നഷ്ടപ്പെട്ട നോമ്പ് നോറ്റ് വീട്ടുകയും, സംഭവിച്ചു പോയ തെറ്റിന് അല്ലാഹുവിനോട് മഗ്ഫിറത് തേടുകയുമാണ്‌ വേണ്ടത്. കഫാറത് അവന്റെ മേല്‍ ബാധ്യതയില്ല.

ചില ചോദ്യങ്ങളും ഉത്തരങ്ങളും:

  • റമദാനിന്റെ പകലാണെന്ന കാര്യം മറന്നു കൊണ്ട് ലൈംഗികബന്ധത്തില്‍ ഏര്‍പ്പെട്ടു. എന്റെ മേല്‍ കഫാറത് നിര്‍ബന്ധമാണോ?

റമദാനിന്റെ പകല്‍ ആണെന്ന കാര്യം ഭാര്യയും ഭര്‍ത്താവും ഒരുമിച്ചു മറക്കുക എന്നത് വളരെ വിദൂരമായി മാത്രം സംഭവിക്കാന്‍ സാധ്യതയുള്ള കാര്യമാണ്. അഥവാ, അങ്ങനെ സംഭവിച്ചു എങ്കില്‍ അവരുടെ മേല്‍ നോമ്പ് നോറ്റ് വീട്ടലോ, കഫാറതോ നിര്‍ബന്ധമില്ല എന്ന അഭിപ്രായമാണ് കൂടുതല്‍ ശരിയായി മനസ്സിലാകുന്നത്. കാരണം, മറന്നു കൊണ്ട് സംഭവിക്കുന്ന തെറ്റുകള്‍ അല്ലാഹു പൊറുത്തു കൊടുത്തിരിക്കുന്നു.

  • പൂര്‍ണമായ ലൈംഗികബന്ധത്തില്‍ ഏര്‍പ്പെട്ടില്ലെങ്കിലും, ബാഹ്യകേളികളാല്‍ തന്നെ സ്ഖലനം സംഭവിച്ചു. എന്റെ മേല്‍ കഫാറത് നിര്‍ബന്ധമാകുമോ?

ഇത്തരം അവസ്ഥകളില്‍ അവന്റെ നോമ്പ് മുറിയുമെങ്കിലും, അയാളുടെ മേല്‍ കഫാറത് നിര്‍ബന്ധമാവുകയില്ല. കാരണം, പരസ്പരം ലൈംഗികാവയവങ്ങള്‍ സ്പര്‍ശിക്കുന്ന തരത്തിലുള്ള ലൈംഗികബന്ധത്തിലാണ് നബി -ﷺ- മേല്‍ പറഞ്ഞ കഫാറത് നിശ്ചയിച്ചിട്ടുള്ളത്. എന്നാല്‍ അതിന് താഴെയുള്ള കാര്യങ്ങളില്‍ ഈ കഫാറത് ബാധകമാകുമെന്നതിന് തെളിവില്ല. അതിനാല്‍ അവന്‍ നോമ്പ് നോറ്റ് വീട്ടുകയും, അല്ലാഹുവിനോട് തൌബ തേടുകയും ചെയ്‌താല്‍ മതി; കഫാറത് നല്‍കേണ്ടതില്ല.

  • റമദാനിന്റെ പല പകലുകളില്‍ പല തവണ ലൈംഗികബന്ധത്തില്‍ ഏര്‍പ്പെട്ടിട്ടുണ്ട്. ധാരാളം നോമ്പുകള്‍ എനിക്ക് ഇപ്രകാരം നഷ്ടപ്പെട്ടിട്ടുണ്ട്. ഈ നോമ്പുകള്‍ക്കെല്ലാം പകരമായി ഒരു തവണ കഫാറത് നല്‍കിയാല്‍ മതിയോ?

മതിയാകില്ല! ഓരോ ദിവസത്തിനും ഓരോ തവണ കഫാറത് നല്‍കണം. അഞ്ചു നോമ്പുകള്‍ ഈ രൂപത്തില്‍ താങ്കള്‍ക്ക് നഷ്ടപ്പെട്ടിട്ടുണ്ട് എങ്കില്‍ അഞ്ചു നോമ്പുകള്‍ക്കും പകരമായി താങ്കള്‍ കഫാറത് നല്‍കണം.

  • റമദാനിന്റെ ഒരു പകലില്‍ പല തവണ ലൈംഗികബന്ധത്തില്‍ ഏര്‍പ്പെട്ടു. എത്ര തവണ കഫാറത് നല്‍കണം?

റമദാനിന്റെ ഒരു പകലില്‍ പല തവണ ലൈംഗികബന്ധത്തില്‍ ഏര്‍പ്പെട്ടാലും അവന്‍ ഒരു തവണ കഫാറത് നല്‍കിയാല്‍ മതി. എന്നാല്‍, ഓരോ തവണ ലൈംഗികബന്ധത്തില്‍ ഏര്‍പ്പെടുന്നതും തെറ്റിന്റെ ഗൌരവവും മ്ലേഛതയും അധികരിപ്പിക്കും എന്നതോര്‍ക്കുക.

-ശ്രദ്ധിക്കുക!- കഫാറത് നല്‍കിയതിന് ശേഷം വീണ്ടും അതേ ദിവസം തന്നെ അവന്‍ പകലില്‍ ലൈംഗികബന്ധത്തില്‍ ഏര്‍പ്പെട്ടാല്‍ വീണ്ടും അവന്‍ കഫാറത് നല്‍കണം.

ഉദാഹരണത്തിന്; ഒരാള്‍ റമദാനിന്റെ പകലില്‍ ലൈംഗിക ബന്ധത്തില്‍ ഏര്‍പ്പെട്ടു; അതേ ദിവസം ഉടനെ തന്നെ അയാള്‍ കഫാറത് നല്‍കുകയും ചെയ്തു. അടിമയെ മോചിപ്പിക്കുകയോ, അറുപത് ദരിദ്രര്‍ക്ക് ഭക്ഷണം നല്‍കുകയോ ചെയ്തു. പിന്നീട് വീണ്ടും -മഗ്രിബ് ആകുന്നതിന് മുന്‍പ്- ലൈംഗികബന്ധത്തില്‍ ഏര്‍പ്പെട്ടാല്‍; വീണ്ടും കഫാറത് നല്‍കണം.

എന്നാല്‍ മേലെ പറഞ്ഞത് പോലെ, കഫാറത് നല്‍കുന്നതിന് മുന്‍പാണ് അയാള്‍ ലൈംഗികബന്ധത്തില്‍ ഏര്‍പ്പെട്ടതെങ്കില്‍ രണ്ടു തവണകള്‍ക്കും പകരമായി ഒരു തവണ കഫാറത് നല്‍കിയാല്‍ മതി.

  • റമദാനില്‍ നഷ്ടപ്പെട്ട നോമ്പുകള്‍ നോറ്റ് വീട്ടുന്നതിനിടയില്‍ പകല്‍ ലൈംഗികബന്ധത്തില്‍ ഏര്‍പ്പെട്ടു. എന്റെ മേല്‍ കഫാറത് ഉണ്ടോ?

ഇല്ല! താങ്കള്‍ അന്നേ ദിവസത്തെ നോമ്പ് മറ്റൊരു ദിവസം നോറ്റ് വീട്ടിയാല്‍ മതി. കാരണം, കഫാറത് നിശ്ചയിക്കപ്പെട്ടിരിക്കുന്നത് ഖുര്‍ആന്‍ അവതരിച്ച മാസമായ റമദാനിന്റെ പകലില്‍ ലൈംഗികബന്ധത്തില്‍ ഏര്‍പ്പെട്ടതിലൂടെ അതിന്റെ മഹത്വം കെടുത്തിയതിനാണ്. ഈ ഗൌരവം മറ്റു ദിവസങ്ങളില്‍ ലൈംഗികബന്ധത്തില്‍ ഏര്‍പ്പെടുന്നതിനില്ല.

എന്നാല്‍ മേല്‍ പറഞ്ഞത് നിര്‍ബന്ധ നോമ്പ് കാരണമില്ലാതെ ഒഴിവാക്കുന്നത് യാതൊരു തെറ്റും ഉള്ള കാര്യമല്ല എന്ന അര്‍ത്ഥത്തില്‍ മനസ്സിലാക്കരുത്. അതിന് ഗൌരവമുണ്ട്. എന്നാല്‍ റമദാനിന്റെ പകലില്‍ സംഭവിക്കുന്നത്ര ഗൌരവമില്ലെന്ന് മാത്രം.

  • റമദാനിന്റെ പകലില്‍ നോമ്പ് മുറിച്ചാലുള്ള കഫാറത് മേലെ വിശദീകരിച്ചു കണ്ടു. എനിക്ക് രണ്ട് മാസം നോമ്പ് എടുക്കാനും, അറുപത് ദരിദ്രര്‍ക്ക് ഭക്ഷണം നല്‍കാനും കഴിയും. ഇതില്‍ ഏതെങ്കിലും ഒന്ന് തിരഞ്ഞെടുത്താല്‍ മതിയാകുമോ?

പറ്റില്ല. രണ്ട് മാസം തുടര്‍ച്ചയായി നോമ്പ് നോല്‍ക്കാന്‍ താങ്കള്‍ക്ക് കഴിയുമെങ്കില്‍ അത് തന്നെ ചെയ്യണം. അതിന് സാധ്യമല്ലെങ്കില്‍ മാത്രമേ അടുത്ത കഫാറതിലേക്ക് -അറുപത് ദരിദ്രര്‍ക്ക് ഭക്ഷണം നല്‍കുക എന്നതിലേക്ക്- താങ്കള്‍ക്ക് പോകാന്‍ കഴിയൂ.

കാരണം, റമദാനിന്റെ പകലില്‍ ലൈംഗികബന്ധത്തില്‍ ഏര്‍പ്പെടുക എന്നതിനുള്ള കഫാറത് ഇഷ്ടപ്രകാരം തിരഞ്ഞെടുക്കാവുന്നതല്ല. അല്ലാഹു -تَعَالَى- നിശ്ചയിച്ച ക്രമത്തില്‍ തന്നെ ചെയ്യേണ്ടതാണ്. ആദ്യത്തെ പടിയിലുള്ളത് സാധിക്കില്ലെങ്കില്‍ മാത്രമേ അടുത്തതിലേക്ക് പോകാന്‍ കഴിയൂ.

  • റമദാനിന്റെ പകലില്‍ ലൈംഗികബന്ധത്തില്‍ ഏര്‍പ്പെട്ടു; കഫാറതായി രണ്ടു മാസം നോമ്പെടുത്തു. ഇനി നഷ്ടപ്പെട്ട നോമ്പ് കടം വീട്ടേണ്ടതു കൂടെയുണ്ടോ?

അതെ! കഫാറതായി രണ്ടു മാസം തുടര്‍ച്ചയായി നോമ്പ് എടുത്തത് കൊണ്ട് മാത്രം നഷ്ടപ്പെട്ട നോമ്പിന്റെ കടം ഒഴിവാവുകയില്ല. അത് മറ്റേതെങ്കിലും ദിവസം എടുത്തു വീട്ടുക തന്നെ വേണം. അടിമയെ മോചിപ്പിച്ചാലും, അറുപത് ദരിദ്രര്‍ക്ക് ഭക്ഷണം കൊടുത്താലും, കഫാറത് നല്‍കാന്‍ കഴിയാത്തതിനാല്‍ അല്ലാഹുവിനോട്‌ പശ്ചാത്താപം തേടുക മാത്രം ചെയ്തിട്ടുള്ളൂവെങ്കിലും; ഈ പറഞ്ഞത് ഒരു പോലെ തന്നെ. നഷ്ടപ്പെട്ട നോമ്പ് അവന്‍ എന്തായാലും നോറ്റ് വീട്ടണം.

  • റമദാനിന്റെ പകലില്‍ ലൈംഗികബന്ധത്തില്‍ ഏര്‍പ്പെട്ടു; കഫാറതായി രണ്ടു മാസം നോമ്പെടുത്ത് തുടങ്ങി. എന്നാല്‍, ഈ ദിവസങ്ങള്‍ക്കിടയില്‍ യാത്ര ചെയ്യേണ്ടി വന്നു; അപ്പോള്‍ നോമ്പ് മുറിക്കാമോ? അത് നോമ്പിന്റെ തുടര്‍ച്ചയെ ബാധിക്കുമോ?

ഇല്ല. മതപരമായി നോമ്പ് മുറിക്കാന്‍ അനുവാദം നല്‍കപ്പെട്ട എന്തു കാരണങ്ങളാലും നോമ്പ് മുറിക്കാം. ഉദാഹരണത്തിന്; യാത്ര, രോഗം പോലുള്ള കാര്യങ്ങള്‍. (നോമ്പ് മുറിക്കാന്‍ ഇളവ് നല്‍കപ്പെട്ടവര്‍ എന്ന ലേഖനം വായിക്കുക.) ഇത്തരം കാരണങ്ങള്‍ കൊണ്ട് നോമ്പ് മുറിച്ചാല്‍ അത് നോമ്പിന്റെ തുടര്‍ച്ചയെ ഇല്ലാതാക്കില്ല.

  • റമദാനിന്റെ പകലില്‍ ലൈംഗികബന്ധത്തില്‍ ഏര്‍പ്പെട്ടു; കഫാറതായി രണ്ടു മാസം നോമ്പെടുത്ത് തുടങ്ങി. എന്നാല്‍, ഒരു ദിവസം മതപരമായ ഒഴിവുകഴിവ് ഒന്നുമില്ലാതെ നോമ്പ് മുറിക്കേണ്ടി വന്നു. ഇനി എന്താണ് ചെയ്യേണ്ടത്?

വീണ്ടും താങ്കള്‍ രണ്ടു മാസത്തെ നോമ്പ് ആരംഭിക്കണം. ഇത് വരെ നോറ്റ നോമ്പുകളുടെ തുടര്‍ച്ച മുറിഞ്ഞിരിക്കുന്നു. തുടര്‍ച്ചയായി രണ്ടു മാസം നോമ്പെടുക്കണം എന്നത് റമദാനിന്റെ പകലില്‍ ലൈംഗികബന്ധത്തില്‍ ഏര്‍പ്പെട്ടവര്‍ക്കുള്ള കഫാറതിന്റെ നിബന്ധനകളില്‍ പെട്ടതാണ്.

  • റമദാനിന്റെ പകലില്‍ യാത്രക്കാരനായിരുന്നത് കൊണ്ട് നോമ്പ് എടുത്തിട്ടില്ലായിരുന്നു. ഈ പകലില്‍ ഭാര്യയുമായി ലൈംഗികബന്ധത്തില്‍ ഏര്‍പ്പെടാമോ?

അതെ! യാത്രക്കാര്‍ക്ക് നോമ്പ് മുറിക്കാനുള്ള അനുവാദം ഉണ്ട്. ഭക്ഷണം കഴിച്ചോ, വെള്ളം കുടിച്ചോ ഒക്കെ അവര്‍ക്ക് നോമ്പ് ഒഴിവാക്കാം. ലൈംഗികബന്ധത്തില്‍ ഏര്‍പ്പെട്ടാലും ഇതേ നിയമം തന്നെയാണ്. അത് കൊണ്ട് അവനെ സംബന്ധിച്ചിടത്തോളം നഷ്ടപ്പെട്ട നോമ്പ് പിന്നീട് നോറ്റ് വീട്ടുക എന്നതല്ലാതെ മറ്റൊന്നും നിര്‍ബന്ധമില്ല. അവന്‍ കഫാറത് നല്‍കേണ്ടതില്ല. വല്ലാഹു അഅലം.

  • റമദാനിന്റെ പകലില്‍ ലൈംഗികബന്ധത്തില്‍ ഏര്‍പ്പെട്ടു; കഫാറതായി രണ്ടു മാസം നോമ്പെടുത്ത് തുടങ്ങി. എന്നാല്‍, ഒരു ദിവസം മതപരമായ ഒഴിവുകഴിവ് ഒന്നുമില്ലാതെ നോമ്പ് മുറിക്കേണ്ടി വന്നു. ഇനി എന്താണ് ചെയ്യേണ്ടത്?

വീണ്ടും താങ്കള്‍ രണ്ടു മാസത്തെ നോമ്പ് ആരംഭിക്കണം. ഇത് വരെ നോറ്റ നോമ്പുകളുടെ തുടര്‍ച്ച മുറിഞ്ഞിരിക്കുന്നു. തുടര്‍ച്ചയായി രണ്ടു മാസം നോമ്പെടുക്കണം എന്നത് കഫാറതിന്റെ നിബന്ധനകളില്‍ പെട്ടതാണ്.

  • റമദാനിന്റെ പകലില്‍ ലൈംഗികബന്ധത്തില്‍ ഏര്‍പ്പെടാന്‍ ഭര്‍ത്താവ് നിര്‍ബന്ധിക്കുന്നു. എന്തു ചെയ്യണം?

റമദാനിന്റെ പകലില്‍ ലൈംഗികബന്ധത്തില്‍ ഏര്‍പ്പെടുക എന്നത് വളരെ ഗുരുതരമായ തിന്മയാണ്. അതിന്റെ ഗൌരവം ഭര്‍ത്താവിനെ ബോധ്യപ്പെടുത്താന്‍ ശ്രമിക്കുക.

അയാള്‍ നിങ്ങളുടെ ഉപദേശത്തിന് ചെവി കൊടുക്കാതിരിക്കുകയും, വീണ്ടും ശക്തമായി നിര്‍ബന്ധിക്കുകയും, വഴങ്ങിയില്ലെങ്കില്‍ ഉപദ്രവിക്കുകയും ചെയ്യും എന്നാണെങ്കില്‍ നിങ്ങള്‍ക്ക് പിന്നീട് സംഭവിക്കുന്നതിന്റെ പാപഭാരമില്ല. നിങ്ങളുടെ നോമ്പ് -അയാളുമായി ലൈഗികബന്ധത്തില്‍ ഏര്‍പ്പെട്ടാലും- നിഷ്ഫലമായിട്ടില്ല എന്നതാണ് ശരി.

ഈ ദിവസത്തിന് പകരമായി നിങ്ങള്‍ നോമ്പ് എടുക്കുകയോ, കഫാറത് നല്‍കുകയോ ഒന്നും ചെയ്യേണ്ടതില്ല. കാരണം നിങ്ങള്‍ -മേലെ വിശദീകരിച്ചത് പോലെ- നിര്‍ബന്ധിതാവസ്ഥയില്‍ നോമ്പ് മുറിച്ചതാണ്.

എന്നാല്‍, റമദാനിന്റെ പകലില്‍ ലൈംഗിക ബന്ധത്തില്‍ ഏര്‍പ്പെടുക എന്ന ഗുരുതരമായ തെറ്റ് ചെയ്ത ഭര്‍ത്താവ് അതിന്റെ കഫാറത് നിര്‍വ്വഹിക്കുകയും, അല്ലാഹുവിനോട് പശ്ചാത്താപം തേടുകയും ചെയ്യേണ്ടതാണ്.

  • സുന്നത് നോമ്പ് നോല്‍ക്കുന്നതിന് ഇടയില്‍ ലൈംഗികബന്ധത്തില്‍ ഏര്‍പ്പെട്ടു. എന്തു ചെയ്യണം?

അയാളുടെ മേല്‍ നോമ്പ് നോറ്റ് വീട്ടലോ, കഫാറതോ ഒന്നും ബാധ്യതയില്ല. അയാള്‍ ഉദ്ദേശിക്കുന്നെങ്കില്‍ നോമ്പ് മറ്റൊരു ദിവസം വീണ്ടും നോല്‍ക്കാം. എന്നാല്‍ അതും അയാളുടെ മേല്‍ നിര്‍ബന്ധമില്ല.

  • നോമ്പിന്റെ പകലില്‍ ഭാര്യയെ ചുംബിച്ചപ്പോള്‍ മദിയ്യ് പുറത്തു വന്നു. എന്താണ് ചെയ്യണ്ടത്?

മദിയ്യ് പുറത്തു വന്നാല്‍ നോമ്പ് മുറിയില്ലെന്ന അഭിപ്രായമാണ് കൂടുതല്‍ ശരിയായി മനസ്സിലാകുന്നത്. അതിനാല്‍ മേല്‍ പറഞ്ഞ അവസ്ഥയില്‍ നോമ്പ് മുറിഞ്ഞിട്ടില്ല. എന്നാല്‍, മനിയ്യ്‌ പുറത്തു വന്നാലാകട്ടെ; നോമ്പ് മുറിയുകയും ചെയ്യും. അവന്‍ നഷ്ടപ്പെട്ട നോമ്പ് നോറ്റ് വീട്ടുകയും ചെയ്യേണ്ടതാണ്.

  • റമദാനിന്റെ പകലില്‍ ലൈംഗികബന്ധത്തില്‍ ഏര്‍പ്പെട്ടു. ഭാര്യയും ഭര്‍ത്താവും കഫാറത് നല്‍കണോ? അതല്ല; ഒരാള്‍ മാത്രം നല്‍കിയാല്‍ മതിയോ?

ഭര്‍ത്താവിന്റെ ശക്തമായ നിര്‍ബന്ധത്തിന് വഴങ്ങിയാണ് ഭാര്യ ലൈംഗികബന്ധത്തില്‍ ഏര്‍പ്പെട്ടതെങ്കില്‍ അത് അവരുടെ നോമ്പിനെ ബാധിക്കുകയില്ല എന്നു മേലെ വിശദീകരിച്ചു കഴിഞ്ഞല്ലോ? എന്നാല്‍ ഭാര്യയുടെ കൂടെ സമ്മതത്തോടെയാണ് റമദാനിന്റെ പകലില്‍ ലൈംഗികബന്ധം നടന്നത് എങ്കില്‍ അവളുടെ മേല്‍ കഫാറത് നിര്‍ബന്ധമാണോ അല്ലെ?

രണ്ട് അഭിപ്രായങ്ങള്‍ പണ്ഡിതന്മാര്‍ക്ക് ഉണ്ട്. വേണ്ടതില്ലെന്നും വേണമെന്നും പറഞ്ഞവരുണ്ട്. കൂടുതല്‍ ശരിയായ അഭിപ്രായമായി മനസ്സിലാകുന്നത് ഭാര്യയുടെ മേലും കഫാറത് നിര്‍ബന്ധമാകും എന്ന അഭിപ്രായമാണ്. വലിയൊരു വിഭാഗം പണ്ഡിതന്മാരുടെ അഭിപ്രായവും അത് തന്നെയാണ്.

കാരണം, ഇസ്ലാമിലെ നിയമങ്ങള്‍ പുരുഷന്മാര്‍ക്ക് ബാധകമാകുന്നത് പോലെ തന്നെ സ്ത്രീകള്‍ക്കും ബാധകമാണ്. അല്ലയെന്നുണ്ടെങ്കില്‍ അതിന് പ്രത്യേകം തെളിവ് വേണ്ടതുണ്ട്. അത് ഈ വിഷയത്തില്‍ വന്നിട്ടുമില്ല. അതിനാല്‍, ഭാര്യയും ഭര്‍ത്താവും കഫാറത് നല്‍കല്‍ നിര്‍ബന്ധമാണ്‌.

وَصَلَّى اللَّهُ وَسَلَّمَ وَبَارَكَ عَلَى رَسُولِنَا وَنَبِيِّنَا مُحَمَّدِ بْنِ عَبْدِ اللَّهِ، وَعَلَى آلِهِ وَصَحْبِهِ وَسَلَّمَ

وَآخِرُ دَعْوَانَا أَنِ الحَمْدُ لِلَّهِ رَبِّ العَالَمِينَ.

كَتَبَهُ : أَبُو تُرَاب عَبْد المُحْسِن بْن سَيِّد عَلِيّ عَيْدِيدُ

-غَفَرَ اللَّهُ لَهُ وَلِوَالِدَيْهِ وَلِجَمِيعِ المُسْلِمِينَ-

ലേഖനത്തിന്റെ പ്രധാന അവലംബം: അസ്സ്വിയാമു ഫില്‍ ഇസ്ലാം/ശൈഖ് സഈദ് അല്‍-ഖഹ്ത്വാനി

About the author

അബ്ദുല്‍ മുഹ്സിന്‍ ഐദീദ്

Leave a Reply

error:
%d bloggers like this: