പുരുഷന്മാര്‍ക്ക് ചേലാകര്‍മ്മം നിര്‍ബന്ധമാണോ അല്ലേ എന്നതില്‍ പണ്ഡിതന്മാര്‍ക്കിടയില്‍ സുദീര്‍ഘമായ ചര്‍ച്ചയുണ്ട്. കൂടുതല്‍ ശരിയോടു അടുത്തതായി തോന്നുന്നത് -വല്ലാഹു അഅലം- ചേലാകര്‍മ്മം പുരുഷന്മാര്‍ക്ക് നിര്‍ബന്ധമാണ്‌ എന്നതാണ്. ബഹുഭൂരിപക്ഷം പണ്ഡിതന്മാരുടെയും അഭിപ്രായം അതാണ്‌. ചേലാകര്‍മ്മത്തിന്റെ പ്രാധാന്യവും ഇസ്‌ലാമില്‍ അതിനുള്ള സ്ഥാനവും വിശദീകരിക്കുന്ന ധാരാളം ഹദീസുകള്‍ വന്നിട്ടുമുണ്ട്.
عَنْ أَبِي هُرَيْرَةَ رَضِيَ اللَّهُ عَنْهُ: سَمِعْتُ النَّبِيَّ -ﷺ- يَقُولُ: «الفِطْرَةُ خَمْسٌ: الخِتَانُ، وَالِاسْتِحْدَادُ، وَقَصُّ الشَّارِبِ، وَتَقْلِيمُ الأَظْفَارِ، وَنَتْفُ الآبَاطِ»
നബി -ﷺ- പറഞ്ഞു: “അഞ്ചു കാര്യങ്ങള്‍ ഫിത്വ്–റത്തില്‍ പെട്ടതാണ്. ചേലാകര്‍മ്മം, ഗുഹ്യാവയവങ്ങളിലെ രോമം വടിക്കല്‍, കക്ഷത്തിലെ രോമം പറിക്കല്‍, നഖം വെട്ടല്‍, മീശ ചെറുതാക്കല്‍ (എന്നിവയാണവ).” (ബുഖാരി: 5891, മുസ്‌ലിം: 257)
മാത്രവുമല്ല നിസ്കാരം ശരിയാകാന്‍ നിര്‍ബന്ധമായ ശുദ്ധി പാലിക്കാന്‍ ചേലാകര്‍മ്മം വളരെ ആവശ്യമാണ്‌. ഇല്ലെങ്കില്‍ മൂത്രമൊഴിച്ചാല്‍ -ലൈംഗികാവയത്തിന് ചുറ്റും- മൂത്രം കെട്ടിക്കിടക്കാന്‍ വളരെ സാധ്യതയുണ്ട്. ഓരോ തവണയും മൂത്രമൊഴിക്കുമ്പോള്‍ അവിടെ പ്രത്യേകം കഴുകി വൃത്തിയാക്കുക എന്നത് ലൈംഗികാവയവത്തിന് പരുക്കുണ്ടാക്കാന്‍ സാധ്യതയുണ്ട്. ഈ കാരണങ്ങള്‍ കൊണ്ടും, -നേരത്തെ നല്‍കിയ ഹദീസുകളുടെ അടിസ്ഥാനത്തിലും- ചേലാകര്‍മ്മം പുരുഷന്മാര്‍ക്ക് നിര്‍ബന്ധമാണ്‌ എന്നാണ് മനസ്സിലാകുന്നത്. വല്ലാഹു അഅലം.