ഇഅ്തികാഫ്

ഇഅ്തികാഫിന് ഇടയിൽ വീട്ടിൽ ആവശ്യങ്ങൾക്ക് പോയാൽ ഭാര്യയുമായി സല്ലപിക്കുന്നത് അനുവദനീയമാണോ?

ഇഅ്തികാഫിനിടയിൽ ഭാര്യയുമായി ലൈംഗികബന്ധത്തിൽ ഏർപ്പെടുന്നത് അനുവദനീയമല്ല. അത് ഇഅ്തികാഫിനെ നശിപ്പിക്കുന്ന കാര്യമാണ്. അതിനാൽ ഇഅ്തികാഫിനിടയിൽ എന്തെങ്കിലും അത്യാവശ്യങ്ങൾക്ക് വേണ്ടി വീട്ടിലേക്ക് പോയാൽ അവിടെ വെച്ച് ഭാര്യയുമായി സല്ലപിക്കുക എന്നത് ഒഴിവാക്കേണ്ടതാണ്. ഈ വേളയിൽ ഭാര്യയുമായി ലൈംഗികബന്ധത്തിൽ ഏർപ്പെട്ടാൽ അത് അവൻ്റെ ഇഅ്തികാഫ് മുറിക്കുന്നതാണ്. അല്ലാഹു പറയുന്നു:

وَلَا تُبَاشِرُوهُنَّ وَأَنتُمْ عَاكِفُونَ فِي الْمَسَاجِدِ ۗ

“എന്നാല്‍ നിങ്ങള്‍ മസ്ജിദുകളിൽ ഇഅ്തികാഫ് (ഭജനം) ഇരിക്കുമ്പോള്‍ അവരു (ഭാര്യമാരു) മായി സഹവസിക്കരുത്‌. ” (ബഖറ: 187)

ആയത്തിനെ വിശദീകരിച്ചു കൊണ്ട് ഇമാം ഖതാദഃ -رَحِمَهُ اللَّهُ- പറയുന്നു: “ജനങ്ങൾ ഇഅ്തികാഫ് ഇരുന്നാൽ മസ്ജിദിൽ നിന്ന് വീട്ടിലേക്ക് പോവുകയും ഭാര്യയുമായി സല്ലപിക്കുകയും ചെയ്യാറുണ്ടായിരുന്നു. ശേഷം അവർ മസ്ജിദിലേക്ക് തന്നെ തിരിച്ചു വരും. ഈ ആയത്തിൽ അല്ലാഹു അത് അവരോട് വിലക്കുകയാണ്.” (ത്വബ്രി: 3/541)

ഇഅ്തികാഫിനിടയിൽ ലൈംഗികബന്ധത്തിൽ ഏർപ്പെട്ടു പോയാൽ അതോടെ അവൻ്റെ ഇഅ്തികാഫ് മുറിയും. ഈ പ്രവൃത്തി സംഭവിച്ചു പോയാൽ അതിന് കഫാറത് ഒന്നും സ്ഥിരപ്പെട്ടിട്ടില്ല. എന്നാൽ റമദാനിൻ്റെ പകലിലാണ് സംഭവിച്ചതെങ്കിൽ അതിനുള്ള കഫാറത് നിർവ്വഹിക്കണം എന്നു മാത്രം. ഇനി ആരെങ്കിലും റമദാനിലെ അവസാനത്തെ പത്ത് നേർച്ച നേർന്നു കൊണ്ട് ഇഅ്തികാഫ് ഇരുന്നതാണെങ്കിൽ നേർച്ച ലംഘിച്ചതിന് പകരമായി ശപഥലംഘനത്തിൻ്റെ കഫാറത് നൽകണം. വല്ലാഹു അഅ്ലം.

Leave a Comment